Cau'r drws ar 'Stiwt y Glowyr

Cafodd y 'Stiwt ei agor yn 1924

Mae un o adeiladau enwoca Wrecsam wedi cau'r drws am y tro ola.

Oherwydd nad oes digon o bobl yn mynychu 'Stiwt y Glowyr bu'n rhaid i'r lle gau am 10.30pm nos Sadwrn.

Yn ôl gweinyddwyr y 'Stiwt, oherwydd prinder aelodau does dim modd fforddio'r £3,000 y mis i wresogi'r adeilad.

Yno yr oedd yr hen lowyr yn torri syched ym mlynyddoedd cynnar y ganrif ddiwetha a'u ceiniogau prin nhw wnaeth dalu am yr adeilad yn ôl yn 1924.

Mae'r pyllau wedi hen fynd a dyna ydi hanes y 'Stiwt hefyd erbyn hyn.

I'r ffyddloniaid mae colli'r 'Stiwt yn ergyd.

Colled

"Mae'n adeilad hardd sydd wedi sefyll yma ers degawdau," meddai'r Cynghorydd Marc Jones ac un o gwsmeriaid y 'Stiwt.

"Mae 'na arwydd ar y drws yn dweud, 'Dydach chi ddim yn gwybod be 'da chi wedi ei golli tan iddo fynd'.

Diffyg arian oedd y rheswm dros gau

"Dwi'n meddwl, er mai ychydig oedd yn dod yma, y bydd 'na golled unwaith mae o wedi cau."

Does 'na ddim digon o bobl yn yfed yno a hynny yn arwain at broblemau ariannol.

Mae'r elusen oedd yn rhedeg y lle yn colli cannoedd o bunnau'r mis o fod yn cadw un o adeiladau eiconaidd y dre ar agor.

"Does 'na ddim digon o bobl yn dod drwy'r drws ac mae'r lle 'ma eisiau pres," meddai Denzil Pemberton, Cyfarwyddwr y 'Stiwt.

"Does 'na ddim digon o bres yma."

Colli cwmnïaeth

Mae'r newyddion am y cau yn syndod i dre sydd â chymaint o ddyled i'r traddodiad glofaol.

"Y peth cynta wyddon ni am hyn oedd pan wnaeth y wasg gysylltu gyda ni," meddai'r Cynghorydd Aled Roberts, Arweinydd Cyngor Sir Wrecsam.

Doedd dim digon o bobl yn mynd i'r 'Stiwt

"Rydan ni wedi bod mewn cysylltiad gyda'r cwmni ers hynny ond mae'n edrych yn o ddu."

Dywedodd Vaughan Pritchard, un o aelodau'r Stiwt, bod y gwmnïaeth yn mynd hefyd.

"Mae'r niferoedd wedi mynd lawr ac i lawr ac i lawr.

"Fel y dywedodd I D Hooson, 'ofer disgwyl y dyddiau pell yn ôl', ond does 'na ddim llawer yn dod yma i gymryd lle'r hen lowyr."

Ond gyda'r drws ar gau be ydi'r dyfodol?

Yn ôl y rhai oedd yn cael y ddiod ola wrth y bar, safle i ddatblygwyr oedd y son am yr hen le.