Tân Aber: Pedwar ar fechnïaeth

Cafodd y capel ei ddifrodi'n sylweddol gan y tân

Mae pedwar ar fechnïaeth ar ôl cael eu harestio mewn cysylltiad â thân sy wedi difrodi hen gapel yn Aberystwyth.

Dywedodd yr heddlu fod dau fachgen o dan 18 oed ymhlith y pedwar.

Yn y cyfamser, mae 12 o bobl wedi treulio trydedd noson i ffwrdd o'u cartrefi ar ôl y tân yn un o hen gapeli mwya'r dref, Capel y Tabernacl.

Bu'n rhaid i'r 12 adael eu tai yn hwyr nos Wener a dechreuodd y tân am 11.55pm.

Mae'r adeilad yn dal i fod yn anniogel ac ar un adeg roedd wyth o griwiau'n ceisio cadw'r fflamau o dan reolaeth.

Fe gydiodd y tân yn yr adeilad pedwar llawr.

O ganlyniad, fe adawodd y 12 eu tai yn Stryd Powell y tu ôl i'r capel.

Achos y tân

"Roedd rhaid i ni gau'r strydoedd achos bod 'na bosibilrwydd y gallai'r adeilad gwympo lawr," meddai Arwel James o'r Gwasanaeth Tân."

Mae 'na bryder bod yr adeilad yn ansefydlog ar ôl y tân

Dyw hi ddim yn glir ar hyn o bryd beth achosodd y tân.

Mae'r adeilad o oes Fictoria wedi bod yn wag am fwy na phum mlynedd.

Fe gaeodd yr adeilad, sy'n dyddio'n ôl i 1880, ym mis Tachwedd 2002 oherwydd costau cynnal a chadw.

Ar y pryd roedd cynulleidfa o 70.